Eider Corral diseinatzaile grafikoak egin du aurtengo Zinebiko kartela

Azaroaren 13ik 20ra Zinebi Bilboko Zinema Dokumentalaren eta Film Laburren Nazioarteko Jaialdiaren 62. edizioa ospatuko da. Artistek aurkeztutako kartelen artean Eider Corral diseinatzaile grafiko eta arte zuzendariak aurkeztutako kartela hautatu dute aurtengo Zinebirako. Kartel horretan, pandemiak ekarritako errealitatearen parte bat islatu nahi izan du artistak. Covid-19ak eraldatutako errealitatearen sentsazio horrek inspiratuta, eta errealitatea eta fikzioa elkar hartuta bizi diren lekuetan jopuntua jarrita, Corralek zera adierazi du: «Bilboko kaleetara irten naiz, pertsonek hirian elkarrekin berriro nola egiten duten topo ikusteko».

Horrela, kartelean Salve zubiko eguneroko errealitatearen zenbait irudi erabiltzen dira. Irudi horien bidez, errealitatearen erregistro dokumentalarekin eta kontakizun batekin, irudi grafiko bat sortu du, 'close-up' baliabidearen bidez urte honi lotutako istorioak, fantasiak eta oroitzapenak iradokitzen dituena.

Eider Komunikazioan lizentziatua da Euskal Herriko Unibertsitatean, eta hasiera batean musikari eta kulturari lotutako proiektuak lantzeari ekin zion. Bilbon hasi zen lanean, baina Bartzelonan lan egiteko aukera hobeak egongo zirelakoan, hara joan zen diseinu grafikoa ikastera, eta tipografian espezializatu zen.

Dioen moduan, iradokitzea, esatea baino gehiago gustatzen zaio, eta tipografiaren bidez, atmosferak eta esanahiak bateratzen ditu. Horrela, hainbat estudiotan lan egin du, bere kontura lanean jarri zen arte. Tarteka, bitxigintzaren munduan ere ibili da; eraztun, domina eta paparreko orratzen E*Jewels izeneko bilduma aurkeztu zuen.

Aspaldi darama dagoeneko diseinu grafikoaren arloan, besteak beste Christina Rosenvinge, Martirio eta Sílvia Pérez Cruz artistekin lan egin du, baita Iruñeko El Columpio Asesino musika-taldearekin ere. Horrez gain, Blue Note eta Deutsche Grammophon diskoetxeekin, Berlingo Sternberg Press argitaletxearekin eta Columbiako Unibertsitatearekin lankidetzan aritu da. Gaur egun, kultura arloko elkarte eta proiektuetan aholkulari gisa lan egiten du. Bere lanei buruzko informazio gehiago hemen eskura dezakezu.

• Temas
• euskera
• Zinebi