Durangoko Azokako Ahotsenean 17 musika taldek plazaratuko dute lehen diskoa

Bi hilabete eskas falta dira Durangoko Liburu eta Disko Azokaren 58. edizioak eztanda egiteko, 'Fantasia DA!' lelopean. Jendea irrikan dago zer aurkituko dugun jakiteko. Ahotsenea, Irudienea, Kabia, Saguganbara, Szenatokia eta Talaia ekintzez beteko dira, hor ez dago zalantzarik. Oraingo honetan Ahotsenea zer izango den azalduko dugu. Horrela, abenduaren 6tik 10era, 49 talde igaroko dira Plateruenako agertokitik, eta horietatik 17k lehen diskoa argitaratuko dute. Nortzuk? Hona hemen zerrenda: Akaleia, Eider, Eire, Etxepe, Haira, Haize-arrosa, Ithaka, Kadira, Karma, Ke lepo, Lilo, Mamu, Muare, Nakar, TRB, Txopet eta Zatibi.

Hala, musikazaleek talde hasiberrien lanak zuzenean ezagutzeko aukera izango dute. Izan ere, sortzaile berriei ate bat zabalduz, euskal kultura indartzen jarraitzea baita Durangoko Azokaren helburua.

Gainerako 32 taldeei dagokienez, askotariko estiloak jorratuko dira. Nøgen taldeak labetik atera berri duen diskoa aurkeztuko du, adibidez. Musikan 30 urtetik gora daramatzan Leihotikan taldea indarberrituta dator, Gorka Urbizuren ekoizpenarekin eta kolaborazioarekin. Rock estilotik haratago, Amoranteren eta Ibil Bediren proposamenak aipa daitezke, besteak beste.

Zerrenda luzea da: Amorante, Arima, Braulio, EKG, Esanezin, Ezezez, Feline, Ibil Bedi, Intza, Jabi Patxon eta Kofradia Rock, Kemaronte, Konpost, Kuma No Motor, Leihotikan, Lotura, Marlik, Miren eta Roberto Etxebarria, Modus Operandi, Moxal, Murgi, Muzak, Nøgen, Otoi, Postal Kolekzionistak, Rukula, Sara Zozaya, Silitia, Toc, Yogurinha Borova, Xabi San Sebastian, Zeker eta Zukan. Itxura ona du, ezta? Ez izan zalantzarik, eta murgildu Durangon abenduko egun horietan.

Gainera, emanaldi guztiak streaming bidez ere ikusteko aukera izango dugu Durangoko Azokaren webgunean.

• Temas
• Durangoko Azoka
• Euskal Literatura
• Euskal musika
• Euskera
• Liburuak
• Musika