Desfasatuta dago aspirazioak izatea? Erantzuna, gaur, 'Obsoletus' antzezlanean

'Obsoletus' antzezlana ikusteko aukera izango dute interesdunek gaur arratsaldean, Bilboko Arriaga antzokian. Anodino Teatroa antzerki konpainiaren komedia hau Aitor Fernandinok idatzi du, eta euskaraz antzeztuko dute Fernandinok berak, Juanjo Oterok eta Aiora Sedanok. Antzerki muntaiaren zuzendaritzaz Pako Revueltas arduratu da.

Lanak ordu eta laurden irauten du eta hurbiltzen direnek «ustezko terroristei eta lokarturiko Gandhiei buruzko euskal komedia politiko bat, lotsagabea eta ausarta» aurkituko dutela nabarmendu dute antolatzaileek. Lan gatazka bat eta botere galera dira obraren ardatza, izan ere, hainbat hilabeteren ondoren, fabrika ixtearen aurreko protesta jendetsua ahulduta dago, eta Ione eta Elias baino ez dira geratzen. Kontua da Txarliren etorrerak itxaropena ekarri duela: akordioak lortu ditu, baina baldintza batekin, berehala utzi behar dutela itxialdia.

Horrela, antzezlanak planteatzen du gaur egungo gizartean borrokak zentzurik duen ala zaharkituta geratu den, eta balitekeela «formak, agian, ez egotea desfasatuta, beharbada, asmoak izatea baita desfasatuta dagoena»...

Anodino Teatroa taldearen arabera, «nahikoa da azkenaldiko gatazkei begiratu azkar bat ematea ikusteko hedabideek, lider politikoek eta gatazkarekin zerikusia duten taldeek 'indarkeria' hitza berehala erabiltzen dutela edozein gizarte mugimendu estigmatizatzeko». Ildo horretan, jarraitu dute, «indarkeria mota guztiak, intentsitate txikikoak izan arren, zaharkituta geratu dira. Gizartea ere orokortze horren biktima izan da eta aldarrikapenak suntsitzen ditu kalera ateratzen direnean, balantza erabat desorekatuz. Hausnarketa horretatik abiatuz, gaiak antzerki jolaserako bide ematen du».

Beraz, 'Obsoletus' komediaz gozatu nahi baduzu, anima zaitez 19.30ean taularatuko den lan honetaz gozatzera, sarrerak salgai baitaude, 18 euroan, hemen eta antzokiko txarteldegietan, aurretiazko salmenta ordutegian.

• Temas
• Antzerkia
• Euskera