Dantzertik jardunaldi birtuala egingo da, goi mailako ikasketen eskaintza ezagutarazteko

Erabaki al duzu dagoeneko datorren urtean zer ikasiko duzun? Zure alde artistikoa landu nahi duzu? Asteburu honetan sormena lantzeko ikasketak aukeratzeko aukera egongo da. Dantzerti Euskadiko Arte Dramatiko eta Dantza Goi Mailako Eskolak informazio eta gerturatze jardunaldi birtuala antolatuko du larunbata honetan, maiatzaren 8an, ikastegiak eskaintzen dituen goi mailako ikasketak ezagutzea emateko.

Zehazki, eskolako zuzendaritza taldeak eta irakasleek Dantzerti aurkeztuko dute, eta azalduko dute nola dauden antolatuak bertan eskaintzen diren goi mailako irakaskuntza artistikoko bi titulazioak edo nola sartu ikasketa horiek egitera 2021-2022ko ikasturtean. Beraz, aholku eta gomendio interesgarriak eskainiko dituzte. Parte hartzaileen galderak ere erantzungo dituzte.

Eusko Jaurlaritzako Hezkuntza Sailetik jakinarazi dutenez, Dantzertik goi mailako irakaskuntza artistikoetako bi titulazio ikasteko aukera ematen du, lau urteko iraupenekoak, eta unibertsitate graduaren baliokideak: Arte Dramatikoko Goi Mailako Titulua eta Dantzako Goi Mailako Titulua.

Informazio saioak 90 bat minutuko iraupena izango du, eta interesdunekiko elkarrizketa ireki batean oinarrituko da, Zoom plataforma birtualaren bidez. Sarbide irizpideak zeintzuk diren argitzeko aukera izango da, edo sarbide frogen edozein zalantza argitzeko. Ikasketa plana nolakoa den eta titulatuen aukera profesionalak zeintzuk izan daitezkeen ere azalduko da. Horrez gain, zuzenean sortutako zalantzak irakasleei galdetzeko tarterik ere izango da.