'Central parkeko heroiak' ikusgai, Zinema Euskaraz programaren baitan

Uda ere garai aparta da zinemara hurbiltzeko. Itzalean film on batez goza daiteke, freskoan eta lasaitasun osoz. 'Central parkeko heroiak' filma ostiral honetan bertan estreinatu da EAEko hainbat aretotan, Zinema Euskaraz programaren eskutik. Publiko orokorrari bideratuta dagoen film frantsesa euskarara bikoiztuta ikusi ahal izango dugu.

Zineuskadik sustatutako Zinema Euskaraz programaren barruan aurten ikusiko dugun zortzigarren filma da,'Buffalo Kids' lanaren ostean. Euskal ikus-entzunezkoen sektoreari laguntzeko helburua du Eusko Jaurlaritzako Kultura eta Hizkuntza Politika sailak bultzatutako programa honek, eta haur zein gazteei zuzendutako pelikulen bikoizketaz arduratzen da, zinemagintzan euskararen hedapena bultzatzearren. 

Don irudimen mugagabea duen txotxongilo iheslaria da, eta DJ Doggy Dog lagun bila dabilen pelutxe abandonatua da. Biek Central Parken egingo dute topo eta adiskidetasun abentura epiko batean murgilduko dira.

Filma proiektatuko da hurrengo zinema-aretoetan: Golem Alhondiga (Bilbo), Golem La Morea (Iruña), Multicines 7 (Bilbo), Cines Niessen (Errenteria), Cines Florida (Gasteiz) eta SADE Cines (Donostia).

Datozen hilabeteetan, beste film batzuk ere izango ditugu Zinema Euskaraz programaren barruan: irailaren 13an, 'Liskor kapitaina', eta abenduaren 5ean, 'SuperKlaus'.

Zinema Euskaraz programaren helburua Euskadiko herritarrei, balio zinematografikoez gain, euskararen erabilera sustatuko duen filmen aukeraketa iritsaraztea da; izan ere, euskara komunikazio kulturalaren eta normalizaziorako bidea da aisialdiaren eta entretenimenduaren eremuan. Zineuskadik zineman euskaraz bultzatzen du areto komertzialetan estreinaldiak eta euskaraz bikoiztutako edota azpititulatutako film luzeen zirkuitu alternatiboak sustatzera bideratutako laguntza-programaren bidez.

• Temas
• Euskera
• Zinema