Burdinbidearen Euskal Museoaren lurrunezko zazpi tren, hurrengo egunetan

Duela aste batzuk esan genuen bezala, mota guztietako zaletasunak daude, baina trenbidearen zale amorratuak talde zabala dira. Bada, horietakoa bazara, jakin ezazu larunbatetik asteartera bitarte, uztailaren 22tik 25era bitarte, Azpeitiako Burdinbidearen Euskal Museoak lurrunezko zazpi tren jarriko dituela martxan.

Euskotrenek jakinarazi duenez, trenek museoaren instalazioetatik Lasaora bitarteko bidaia egingo dute larunbatean, igandean eta asteartean, astelehenean itxita baitago. Lehenengo egunean, uztailaren 22an, 12.00etan, 13.00etan, 17.00etan eta 18.00etan irtengo dira trenak, uztailaren 23an 12.00etan eta 13.00etan, eta uztailaren 25ean 12.00etan.

Lurrunezko trenean Lasaorako bidaia egiteaz gain, museoa bisitatzeko aukera ere izango da aipatutako egunetan. Bisita interesgarria, zalantzarik gabe, izan ere, Burdinbidearen Euskal Museoak Europako tren bildumarik onenetakoa erakusten du bere instalazioetan, mota guztietako ibilgailuekin, besteak beste, lurrunezko tren makinak, dieselak eta elektrikoak, automotoreak eta bagoi mota desberdinak. Era berean, museoak Euskadiko makina-erreminta multzorik osoenetakoa du, Urolako trenbideko tailer mekaniko zaharrari esker. Hau gutxi balitz, XIX. mendera arte trenetan erabiltzen ziren uniformeen erakusketa eta munduko tren ordularien bilduma hoberenetakoa ere ditu ikusgai.

Museoaren ordutegia asteartetik larunbatera 10.30etik 14.00etara eta 16:00etatik 19:30era da, eta igande eta jaiegunetan 10:30etik 14:00etara (astelehenak izan ezik).

• Temas
• Azpeitia
• Guipúzcoa