Buenos Airesko Udaleko ordezkaritza bat Bilbora etorri da hiriaren eraldaketa ezagutzeko

Buenos Airesko Udaleko ordezkaritza bat Bilbon izan zen atzo eta gaur izango da ere bai hiriaren «arrakasta kasua» eta zerbitzuak eta sormen industriak bultzatuz egindako eraldaketa ekonomikoa ezagutzeko asmoz. Andres Larre Modernizazio, Berrikuntza eta Teknologia Ministerioko Kabineteburuak eta Manuel Seco Ekonomia Barrutien zuzendari nagusiak osatzen dute ordezkaritza, eta Asier Abaunza Hiri Plangintzako zinegotzi ordezkariarekin bilduko dira gaur, Bilboko Udalak jakinarazi duenez.

1992. urtean senidetu ziren Bilbo eta Buenos Aires artean dauden erakunde loturak sendotzeko asmoz egingo da lan bilera. Bi hiriak dira Unescoren Diseinuaren Hiriak Sareko kideak. Buenos Airesko Udalaren iritziz, Bilbo «hiri sofistikatu eta arrakastatsu» bihurtu da. Atzo hasitako bisitarekin, hiria eta ekonomia suspertzeko prozesuaren eta sormen eta ezagutzaren industriaren aldeko apustuaren berri izan nahi dute, bai eta Bilboko Udalaren eta zenbait eragile ekonomikoren arteko elkarri eragitearen berri ere.

Abaunzarekin bilera egin ostean, ordezkaritza buenosairestarra Bilbao Ekintza udal sozietatearen egoitzara hurbilduko da, eta Bilboko Udalak bultzatutako enpresa sustapenerako estrategiak azalduko dizkiete bilera batean. Agenda osatzeko, Azkuna Zentroa bisitatuko dute. Astearte honetan, berriz, Guggenheim Bilbao Museora joan zen ordezkaritza.

Buenos Airesko udal arloek ministerio izena dute. Horrela, Modernizazio, Berrikuntza eta Teknologia Ministerioa arduratzen da lana, industria eta merkataritza sustatzeaz, garapen ekonomikoa, berrikuntza eta hiri adimendua bultzatzeaz, eta mikroenpresak eta enpresa txiki zein ertainak sortzen laguntzeaz.

• Temas
• Bilbao
• Buenos Aires
• euskera