'Bizi dantza', Pirritx, Porrotx eta Marimototsen ikuskizuna, Zornotza Aretoan

Ilusioz beteriko haurrez gaienzka egongo da ostiral honetan, Amorebieta-Etxanoko Zornotza Aretoa. Zergatik ote? Pirritx, Porrotx eta Marimotots pailazoen 'Bizi Dantza' ikuskizuna eskainiko delako bertan. Emanaldia arratsaldeko 17.15etan hasiko da eta beraiekin Udabarri Dantza Talde zornotzarra ariko da eszenatoki gainean.

2019 urte amaieran aurkeztu zuten proiektu hau pailazoek, eta nola ez, dantzan datoz oraingoan ere, ingurukoak ere dantzan jartzeko asmoz. 'Bizi Dantza' ikuskizunak hamahiru abesti batzen ditu, beste hainbeste kantu-kontuekin batera. Proiektu hau, aurrekoak bezala, talde lana izan da eta pailazoekin elkarlanean aritu dira, besteak beste, Vanesa Castaño eta Jon Maya dantzariena eta Leire Bilbao idazlearena, doinuen hitzak sortu dituena. Azken horrek hain justu, hainbat sari irabazi izan ditu, hala nola Etxepare Saria, Lizardi Saria, Euskadi Literatura Saria eta Kiriko Saria. Maite Mutuberria ilustratzailea eta Xabier Zabala musikaria ere izan dituzte bidelagun diskoa eratzerako orduan.

Familia osoari zuzenduta dagoen ekitaldia eskainiko dute Pirritx, Porrotx eta Marimototsek. Euskadi Sariaren hitzek era honetan aurkezten dute 'Bizi Dantza': «Lurra sortu zen une bertatik, jirabiraka dantzari hasi zen bere buruaren eta eguzkiaren inguruan. Animaliak ere sortu ziren unetik bertatik, dantzari dabiltza lurraren inguruan. Gero ere hitzaren jabe izan aurretik dantzatzen gara, zaldiak, izurdeak eta tximeletak bezala. Pozak eta tristurak azaltzeko dantzatzen gara. Barruak egintzen digunean dantzatzen gara. Gure kultura ospatu eta errituak berritzeko. Garen hori mugimenduan jartzeko. Zangoak luzatuz, gerria mugituz, hegoak astinduz eta ur azpian ere dantzatzen gara gu. Zatoz gurekin dantzara, atera zure barruko animalia plazara!».

• Temas
• Dantza
• Euskal musika
• euskera