Bisita gidatuak eta autobus zerbitzua, Gaztelugatxen, Aste Santuko egunetan

Bermeoko Udalak bisita gidatuak eta autobus zerbitzua eskainiko du Gaztelugatxen Aste Santuko egunetan, apirilak 6, 7, 8, 9 eta 10ean. Egitasmo honek hiru xede konkretu aurkezten ditu: batetik, garraio publikoaren erabilera bultzatzea; bestetik, bisitariak Bermeora erakartzea eta, azkenik, turistei Gaztelugatxeko balio naturalak eta historikoak zeintzuk diren lehen eskutik aditzera ematea.

Bisita gidatuentzako sarrerok www.entradium.com webgunean eskuratu ahal izango dira 7 euroren truke. 6 urtetik 12 urtera bitarteko gazteentzat 2,5 eurokoa izango da sarrera, eta 6 urtetik beherakoentzat, aldiz, doakoa, gehienez jota 6 urtetik beherako 2 haur joan ahal izango direlarik helduen erreserba bakoitzeko. Prezio horren barnean joan-etorriko garraioa, Gaztelugatxera sartzeko txartela eta bisita gidatua daude. Ibilbidearen iraupena 2 ordu eta erdikoa izango da.

Autobus zerbitzuok Lamerako autobus geltokitik eta Itxas-ganeko parkinetik abiatuko dira Gaztelugatxerantz egun seinalatu horietan, 10:30ean eta 12:30ean. Itxas-ganeko aparkalekuan bisitarientzako informazio puntu bat jarriko da, baita Lameran Turismo Bulegoaren ohiko zerbitzua eskuragarri izan ere.

Autobus zerbitzuotan bisitariek Urdaibai Biosfera Erreserbaren inguruko informazioa jasoko dute, baita Matxitxakoko lurmuturra eta itsasargiaren, Matxitxakoko gudaren, Gaztelugatxeko Biotopoaren eta Gaztelugatxeko Donieneri buruzko informazio praktikoa eskuratu ere.

Autobusetik beheratu eta Gaztelugatxera oinezko bidea egin ondoren, ongi etorria emango zaie bisitariei ermita inguruan eta bertan balio erantsiko informazioa eskainiko zaie: Bermeoren eta Gaztelugatxeren hartu-emanak, arrantzaleen sinesmenak eta ohiturak, ermitaren historia, usadioak, urpeko Begoñako eskultura edota zonaldeko toponimia, tarteko. Era berean, Bermeorako bueltako autobus zerbitzuan, Bermeon zer egin eta zer bisitatu daitekeen gogoraraziko zaie bisitariei, baita herriko eskaintzen inguruko informazio zehatza ahalbidetu ere.

• Temas
• Bermeo
• San Juan de Gaztelugatxe
• Euskera