Bilbo Zaharra Forumek euskal idazle eta ilustratzaile ugari batuko ditu

Bilbo Zaharra Forumek euskal idazle eta ilustratzaile ugari batuko ditu. Bilboko Alde Zaharreko euskaltegiak antolatutako egitasmoa da, eta, 'Egile eta ilustratzailea' lelopean Euskal Herriko zenbait marrazkilari eta beste horrenbeste idazle gonbidatu dituzte hitzordu honetara. Asteartetik, martxoaren 3tik, ostegunera, hilaren 5era, ospatuko da Euskaltzaindiak Bilboko Plaza Berrian duen egoitzan. Saio guztiak arratsaldeko zazpietan izango dira eta denak doakoak dira.

Martxoaren 3an Angel Lertxundi idazlea eta Antton Olariaga marrazkilaria aurrez aurre ibiliko dira agertoki gainean. Angel Lertxundik helduentzako eleberri ugari idatzita ere, ezin da ahaztu haur eta umeentzako liburu ugari idatzi dituela. Era berean, Antton Olariaga Zakilixut prentsako komitikietako pertsonaia famatuaren aita dugu. Horretaz gain, haur eta gazteentzat bideratutako hainbat libururentzat marrazkiak jorratu izan ditu.

Matxoaren 4an, aldiz, Bernardo Atxaga idazlea eta Mikel Valverde ilustratzailea bilduko ditu jaialdiak. Atxaga gaur egungo euskal idazle esanguratsuenetarikoa dugu. Xola saileko liburu sortari esker, Euskadi Literatura saria bereganatu zuen, gazteei eta haurrei bideratutako ipuinen alorrean duen trebetasun ikaragarriaren islada dena. Bestalde, Valverdek ilustratzaile gisa ibilbide oparoa jorratu du 90. hamarkadatik gaur egunera luzatu dena. Atxagaren zenbait liburutan ere esku hartu du marrazkilari gisa.

Azkenik, martxoaren 5an, Mariasun Landaren eta Elena Odriozolaren txanda izango da. Landa ume eta haur literatuaren alorrean, Euskal Herriak eman izan duen idazle oparoenetakoa dugu. Bere ibilbidean Euskadi nahiz Espainiako Literatur Sariak irabazi ditu. Odriozolak ere sari biak eskuratu izan ditu ilustrazioaren esparruan, euskal lurraldeko nahiz nazioarteko argitaletxe ezberdinentzat jorratu izan duen lana ezin hobeagoarengatik.

• Temas
• Bernardo Atxaga
• euskera