'Bertsolaritza feminismotik (bir)sortzen' liburua plazaratu du Udako Euskal Unibertsitateak

'Bertsolaritza feminismotik (bir)sortzen' liburua plazaratu du Udako Euskal Unibertsitateak. Obra hau Miren Artetxe Sarasola eta Ane Labaka Mayoz euskal bertsolari eta ikerlariek landu dute. Liburuaren aurkezpen ekitaldia asteartean ospatu zen Donostiako Koldo Mitxelena Kulturgunean. Lana pasa den udan Iruñean UEUren baitan egindako 'Bertsolaritza genero-ikuspegitik' ikastaroaren ondorioaren emaitza da.

Egun, bertsolaritzaren munduan mahaiaren gainean ageri da genero ikuspegiaren gaia. Emakumezko bertsolariaren papera gero eta indar handiagoa hartzen hasia da euskal bertsolaritzan. Hortaz, ikastaroaren helburu berberari lotuta dator argitalpen berri hau, genero ikuspegiaren gaia gero eta gehiago jorratzea, hain zuzen.

Labakak nabarmendu zuenez, «gogoetarako eta eztabaidarako materiala biltzea izan da helburu nagusia». Euskal bertsolariak zioenez etor daitezkeen ikerketa, gogoeta eta praktika feminista gehiagoren pizgarri izatea nahi dute, liburu honen argitalpenaren bitartez. Izan ere, hortik dator liburuaren izenburuan azpimarratu duten ideia, (bir)pentsatzearena.

Euren esanetan, «bertsolaritzaz eta feminismoaz hitz egitea, lehenik eta behin, bertsolaritzaz hitz egitea da». Euskal bertsolariek gaineratu zutenez, bertsolaritzan ageri diren genero desberdinkeriak agertzearen bidez, gure kulturaz eta gizarteaz ere hitz egiten ari dira.

Lau atal ezberdinetan sailkatutako 14 artikulu barnebildu dituzte liburuan eta bertan gai erabat anitzak landu dituzte: bizipenak, gogoetak, adituen ikuspuntuak, herri jakintzak etab. Denei eman nahi izan diete ahotsa. Liburu honetan Ane Labaka eta Miren Artetxez gain, hainbat euskal bertsolari ospetsuk esku hartu dute.

• Temas
• euskera
• Feminismo
• Bertsolaritza
• Bertsolari Txapelketa Nagusia