Berrizek Antonio Deunaren jaietarako proposamen andana dakar

Berrizko Olakueta auzoan jai usaina dago. Asteburu honetan bertan hasiko dira ekitaldiak, kirola nagusi izango delarik, eta ospakizunak urtarrilaren 22ra arte luzatuko dira, gastronomia, musika, antzerkia eta dantza protagonista direla.

Has gaitezen. Ohi bezala, San Antonio XVII. Pilota Txapelketaren finalaurrekoekin hasiko da programazioa, ostiralean eta larunbatean, 12an eta 13an, 19.30etik aurrera, Olakueta pilotalekuan. Barre algara batzuk botatzeko, larunbatean, 19.00etan, Iker Galartzak eta Zuhaitz Gurrutxagak 'Almazenean' ekarriko digute, Kultur Etxean. Igandean, kirol gehiago, MTB martxarekin, 30 kilometro baino gehiagorekin.

Urtarrilaren 16an, 19.00etan, Olakueta plazan hasiko den kalejiraren ondoren, Donien Atxa altxatuko da. Hurrengo egunean, Antonio Deunaren egunean, meza ospatuko da San Antonio ermitan (12.30) eta bertan ere, 19.00etan, El Nido talde burlatarraren kontzertua izango da.

Ospakizunek urtarrilaren 19an izango dute jarraipena. Sagardo festa eta odoloste festa izango ditugu, 19.00etatik aurrera. Hurrengo egunean, larunbatean, Txintxetak Klipa eta Txorroskiloa pailazoen emanaldia izango da Olakueta pilotalekuan, 12.00etan. Arratsaldean, 18.00etan, toki berean, Luhartz taldearen erromeria hasiko da. Ordubete geroago, Bones of Minervaren kontzertua izango da Kultur Etxean.

21ean Eskualdeko XLII Barazki eta Fruitu Erakusketa izango da eta 12.00etan baserriko txerri burualde dastaketa hasiko da. 12.30ean herriko dantza taldeak -Iremiñe eta San Lorentzo- Olakueta plazan arituko dira eta arratsaldean, 19.00etan, Feeling The Vibes dantza ikuskizuna izango da Kultur Etxean. Azkenik, astelehenean, hilak 22, nekazal olinpiadak izango dira 19.00etatik aurrera frontoian.

• Temas
• Berriz
• Euskera