Aurtengo kartela ere «fantasia hutsa» da

«Ohore handia» izan da Ximon Agirrerentzat Durangoko Azokako kartela diseinatzea. 29 urteko ilustratzaile hernaniarrak 'Fantasia' hutsa den lana sortu du 58. edizio honi ongietorria emateko, diseinu benetan koloretsua eta alaia, gazteei zuzendua dagoena. «Ilusio handia egin zidan antolatzaileak nirekin harremanetan jarri zirenean, baina ardura handia sentitzen nuen aldi berean ere, Azokak duen garrantziagatik eta kulturaren erakusleiho handi bat izateagatik», aitortu du sortzaileak.

Kulturaren plaza erraldoia aurten izango den 'fantasia' hiru dimentsioko irudi sakonean ilustratu nahi izan du Agirrek, errealitate birtualean diseinatutako lan honetan. «Hasieratik argi nuen 3Dn egin nahi nuela, gero mundu horren barruan sartu ahal izateko. Aspalditik neukan hori probatzeko gogoa, eta aukera ezin hobea zen. Errealitate birtualak askatasun gehiago ematen dizu diseinatzeko orduan, pasada bat da», argitu du Agirrek, Azokan aurkeztu izan diren zenbait musika diskoen portadaren egilea denak ere (Belako, Lukiek, Toc, Kyxo, etab.).

Bere diseinurako kolore alai, deigarri eta saturatuak aukeratu ditu, Durangoko Azokaren festa izaera bistaratzeko helburuarekin. «Kartelaren ideia nagusia mundu propio bat sortzea izan da, Azokaren ohiko elementuak (liburuak, musika, bideogintza, teknologia berriak...) sortu ditudan pertsonaia fantastikoekin uztartuz», dio.

Kartela aurreran daukan edonork ikus dezake nola, 'Fantasia DA!' leloaren azpian, liburu bat agertzen den, esku batzuk eusten dutena. Hortik, ura sortzen da, azpian aurpegi bat marrazten duelarik, eta piano bat bidelagun daukalarik, beste hainbeste pertsonaien artean, (gitarra jotzen ari den musikari bat, argazkiak ateratzen ari den beste tipo bat, edo bideojokoekin dabilena, esaterako). Honekin guztiarekin Ximonek lortu nahi duena argia da: sormen zikloa isladatzea. «Sorkuntzatik hartzen duzuna, zuk ere kanporatu dezakezula, beste modu batean bada ere. Hori da nire lan honekin isladatu nahi izan dudana», dio.