Askatasun amorrua

Haur basatien ideia horzkatzen du Emily Hughesen albumak, basoan animaliek hazitako neskato baten haurtzaroan kokatuta dago. Basora doitu ondoren, jendartera ezin ohitu den pertsona baten istorioa kontatzen du. Askatasunaren eta naturaren esentzia biltzen du albumak eta norbere sustraiei eta nortasunari fidel izatean oinarritzen da. Garazi Ugaldek euskaratu du jatorrizko izena 'Wild' duen liburua, 1545 argitaletxearen lehen itzulpena izan den hau. Testua xumea da, soberako hitzik gabea, baina espresiboa. Liburuaren bereizgarri nagusia bere ilustrazioen maila da. Hughesen irudiak distiratsuak dira, orrialdetik salto egiten duten mugimendu eta bizitasunez beteak. Horretarako, baso koloreko paleta erabiltzen du: berde sakonek, marroi beroek eta kolore distiratsuen ukituek aldi berean abegikorra eta misteriotsua den atmosfera sortzen dute. Estilo errealista eta fantastikoa uztartzen ditu. Neskatoaren eta animalien adierazpenak halako xehetasun eta emozioz erretratatuta daude, ezen batzuetan hitzik gabe komunikatzen baitute istorioa.

'Basati'k haur bakoitzaren indibidualtasuna eta onarpena sustatzen ditu. Haurraren berezko bulkaden eta hiritar bihurtzeak dakarren otzantzearen arteko tentsioa lantzen du, naturaren eta zibilizazioaren arteko gatazka. Protagonistak ile mardula eta nahasia darama, bere izpirituaren sinbolo; izaki ahaldundua da, menderakaitza; baina xamurtasunez enpatizatzen du irakurleak protagonistarekin. Haren esperientziaren bidez, haurrek beren buruarekiko leialak izatearen garrantziaz haunartuko dute eta kontsentsu sozialak ulertzeko eta errespetatzeko dituzten zailtasunekin konektatuko dute. Azken batean denok, haurrek eta helduok, barruan dugun piztitxo basatiari keinu bat egin, biluztu eta naturara itzultzeko gonbitea da album ilustratu hau.