Areeta, Romo, Neguri eta Andra Marin beira gehiago birziklatzeko erronka

Areetako, Romoko, Neguriko eta Andra Mariko hainbat gunetan bizi diren herritarrei erronka bat planteatuko diete Getxoko Udalak eta Ecovidriok, izan ere, kaleko edukiontzi berdeetan beiraren birziklapena areagotu nahi da toki horietan. Datozen hilabeteotan emaitza onenak eta 2023arekin alderatuta beira birziklatzeko zifrak handitzea lortzen duten bi eremuek zuhaitz autoktonoak landatzea lortuko dute, 6.000 euroko balioa dutenak, Ecovidriok jarrita.

«Gaur egun, Getxon %37ko bereizketa dago etxeko hondakinen jatorrian, kaleko edukiontzietan. Hala ere, larrialdi klimatikoak jatorrizko bilketa-datuak hobetzen jarraitzea eskatzen du, eta gure ingurunea eta mundua toki bizigarriago eta jasangarriago bihurtzea, non ekonomia zirkularra erabat ezarrita egongo den», adierazi du Janire Ocio Azpiegituren, Obren eta Zerbitzuen zinegotziak. Izan ere, Europak eskatzen du 2025erako jatorrizko hondakinen bereizketa %55era iristea.

Bestalde, Oscar Acedo Ecovidrioko zonako gerenteak gogoratu duenez, «beira %100ean birzikla daitekeen materiala da, bere propietateak galdu gabe, behin baino gehiagotan aprobetxa daitekeena. Ekonomia zirkularraren adibide ezin hobea da eta erronkarekin auzoak birziklapena handitzera animatu nahi ditugu. Gainera, zuhaitz gehiago jarriko ditugu udalerri horietan.

Azaldu duenez, Ecovidriok bere ibilgailuetan sartuta du pisatzeko eta GPSarekin lokalizatzeko bilketa-sistema bat eta, horri esker, beiraren jatorrian bereiztea handitzeko gaitasuna atzeman den Getxoko zonetan bildutako tonak ezagut daitezke. Eremu horietako etxebizitzek erronka azaltzen duen gutun bat jasoko dute aste honetan.