Araba Euskaraz, oso dotore, goitik behera

Araba Euskaraz 2022 behar den moduan ospatzeko, eta bide batez, dirua lortzeko, produktu sorta zabala izan da eskuragai. Denetarik erosteko aukera izan da. Baina, lasai, oraindik garaiz zabiltza. Izan ere, bihar ere gauzak erosteko aukera izango da. Eta denetarik diogunean, eskaintza oso zabala izan dela kontutan izan behar dugu. Normalean, arropa izaten da jaun eta jabe, baina egia da bestelako produktuek ere tartea daukatela. Hori bai, aipatu bezala, arropa garaile izaten da beti. Izerditakoak, mahuka motzeko kamisetak, legginsak, poloak, kamiseta teknikoak, tirantedunak... horiek helduentzako.

Haurrek ere txukun-txukun janzteko aukera izango dute eta kolektibo honentzako ere izerditakoak, kamiseta tirantedunak zein mahuka motzekoak, legginsak eta biserak daude salgai. Baina arropaz gain, bestelako osagarri batzuk ere daude: botilak, %100 birziklatutako kotoizko poltsa, metalezko katilua eta bokatak gordetzeko poltsa ere. Elikagaiak ere barneratu dituzte, batez ere edarien aldetik. Horrela, Baias garagardo dastaketa lotea, ardoa Candido Besa Lurrekoa, Trebiñuko sagardoa eta sagar zukua. Azkenik, Tanta zozketarako txartelak ere bost euroren truke salgai.

«Salmentak oso ondo joan dira, data gainean dugula. Azken asteetan jendea asko animatu da. Bi kanpaina egin ditugu: neguko kanpaina (Gabonak baino lehen) eta udaberriko kanpaina (Aste Santua baino lehen). Jendeak primeran erantzun du», gogoratzen du Igone Zubizarretak, Argantzun Ikastolako zuzendariak. Arropa Arabako zortzi ikastoletan eta 'on line' dendan egon da salgai. «Aurten, ez dugu denda fisikorik izan eta nabaritu da 'on line' dendan salmentak igo direla. Azoka eta jai batzuetan denda fisikoa jarri dugu eta atera garen egunetan egun arrakastatsuak izan dira», laburbiltzen du Zubizarretak. Tamalez, «hasierako hilabeteetan ez genuen asko ateratzeko aukerarik izan eta ezin izan genuen kanpo salmenta asko egin. Batez ere, hainbat azoka eta jaietara joateko asmoa genuelako eta bat baino gehiago bertan behera gelditu zirelako», gaineratzen du. Baina, aipatu bezala, bihar ere erosteko aukera izango da. Ez galdu aukera!!!