Antzerkia jaun eta jabe Abadiñon, azaroan

Antzerkiarekin gozatu nahi duzu? Azaroan, Abadiñon, nagusi izango da, Antzerkiñoren VIII. edizioari esker. Sei konpainia amateur eta profesional hurbilduko dira hilaren 4tik 18ra bitartean. Errota Kultur Etxeko eszenatokira hurbiltzearekin nahikoa da eta sarrerak dagoeneko eskura daitezke Errota Kultur Etxean bertan edo Udal Mediatekan, 1, 3 edo 5 euroko prezioan, eta saioa doakoa izango da gonbidapenarekin.

Jaialdia La Locandiera Teatro taldeak inauguratuko du 'El Papa' lanarekin, azaroaren 4an. Hilaren 10ean, 'Baginaren bakarrizketak' etorriko dira Txalo produkzioaren eskutik. Komedia honek argi eta garbi erakusten du emakumeen sexualitatea, lotsa alde batera utziz. Hurrengo egunean, Jarapandra Teatroren 'Media vida' obra gailenduko da.

Hurrengo hitzordua 12an izango da. Abadiñoko Gorakada konpainiak, bere aldetik, familia osoarentzako ikuskizuna eskainiko du: 'Kelonia eta itsasoa'; abesti eran, adiskidetasunaz eta biziraupenaz, mundu batean leku propioaren bilaketaz berba egiten duen istorioa.

Hilaren 17an jauzi egingo dugu ondoren, eta Maider Lasa gasteiztarraren 'Loa loa, laguna' izango da ikusgai. Euskal kantu tradizionalak berreskuratu eta eraldatzeko asmoz, egileak, sentsualitateari eta sexualitateari buruzko hausnarketaren inguruan, abesti horien bertsio berriak sortu ditu Malen Iturrirekin batera. Jaialdiak agur esango digu Kilkarrak antzerki tailerraren 'Políticamente incorrecto' lanarekin.

Azken finean, «egitarauak gustu guztietarako ikuskizunak, komedia, dramaturgia berriak, antzerki familiarra… eskaintzen ditu, gaurkotasun handiko zenbait gairi buruz hausnartzeko», aipatzen du Monika Iglesias Kultura zinegotziak. Izan ere, Antzerkiñoren bereizgarrietako bat antzerki konpainia amateurren presentzia nabarmena da. Gainera, edizio honetan emakumeen gaiei buruzko ekoizpenak eta emakume sortzaileen lan garaikideak ere nabarmentzen dira.

• Temas
• Euskera
• Abadiño
• Antzerkia