Andy Souwer mitoak agur esan dio kickboxing profesionalari

Urte asko igaro dira Andy Souwer kickboxer ospetsua lehen aldiz ring batean ikusi nuenetik. Oso berezia iruditu zitzaidan, izan ere, erasotzaile sutsua izateaz gain, borroketarako praka elastiko luze batzuk janzten zituen, gero modan jarri zituenak. Garai hartan, kickboxing zaleok Eurosport kateko 'Fight Club' saioan Japonian hain ezaguna den 'K1 World Max'eko borrokak ikusten genituen. Albert Kraus, Masato Kobayashi, Buakaw Banchamek (garai hartan Buakaw Por Pramuk bezala borrokatzen zen), Artur Kyshenko, Mike Zambidis, Giorgio Petrosyan... horiek ziren 70 kiloko pisu-mugan aritzen ziren gure idoloak.

Baina urteak ez dira alferrik igarotzen, eta, orain, 'Souwer Power' deritzon herbehereetako borrokalari ospetsuenetarikoari agur esateko momentua heldu zaio. Aurreko ostiralean bere azken borroka egin zuen 'ONE: First Strike'n (Singapurren ospatu zen 'ONE championship'en azken ekitaldian), Marat Grigorian Armenian jaiotako borrokalari belgikarraren aurka. KO teknikoagatik galdu zuen arren, ez dugu esango gaizki ari zenik, baina 38 urterekin (161 garaipen '98 K.o', 22 galdu eta 1 berdindu) atseden hartzeko unea iritsi zaiola esan genezake. «Agur esateko ordua da. Estimatzen dut zuen babesa eta baldintzarik gabeko maitasuna urte hauetan guztietan! Samurai batek bere ezpata betiko uzten du», esan zuen bere agurrean.

Hogeita hamar urteko ibilbidean borrokalari onenekin lehiatu da, eta 2005ean eta 2007an 'K1 World Max' txapelketan lortutako garaipenek mito bihurtu zuten. Gainera, txapelketa ugari irabazi dituela gogoratu behar da ('It 's Showtime', Munduko I.S.K.A txapelketa, 'S-Cup'...), beti erasoan eta konbinazio zehatzekin. Zalantzarik gabe, munduko kickboxer ospetsuenetako eta eraginkorrenetako bat da, bere herrialdeko beste borrokalari batzuen mailan, hala nola, Peter Aerts, Ramon Dekkers, Albert Kraus edo Ernesto Hoost.

Hain da horrela, 2011n zaletasun hori partekatzen dugun lagun batzuk Malagara hurbildu ginela, ring gainean ostikoak, belaunekoak eta ukabilkada izugarriak jotzen ikusteko. Egun, normalagoa da hain maila altuko borrokalariak gure herrialdean borrokatzen ikustea, baina orduan oso gauza arraroa zen, eta une paregabea iruditu zitzaigun. Zertarako etorri zen Souwer Malagara? Ba Abraham Roqueñi Torrelavegako (Kantabria) kickboxerraren aurka neurtzeko. Galtzaile eman zioten orduan herbehereetako borrokalariari, baina laster arantzatxoa kendu zuen, 2012ko maiatzean errebantxa erraz irabazi zionean 'K1 Rising' delakoan.

Edonola ere, inork ezin izango du ahaztu bere ibilbidean Masato, Albert Kraus, Buakaw, Ole Laursen, Virgil Kalakoda, Artur Kyshenko, Andy Ristie, Mike Zambidis, Nieky Holzken, Gago Drago, etabarren aurka eskaini dizkigun borroka ikusgarriak. Horregatik guztiagatik eta borrokarako hain erosoak diren praka elastikoen modagatik, eskerrak ematen dizkizugu Andy! Ez zaitugu ahaztuko.

• Temas
• Euskera