Andaluziako hauteskundeen bost galderak

Hirugarren aldiz jarraian, andaluziarrek hasieran aurreikusitakoa baino lehenago emango dute botoa. Ekainaren 19ko hauteskundeek hainbat galdera aurkezten dute, baina niri bost baino ez zaizkit bururatu. Horraino nire lana; erantzunak nahi badituzue, Juanma Morenoren behiari eskatu. Hona hemen galdera horiek:

Bistan dago Juanma Moreno Bonilla ez dela Isabel Díaz Ayuso. Lehenengoak Cruzcampo edaten du eta bigarrenak, ordez, Mahou. Madrilgo presidentearen hiperbole eta konplexurik gabeko borroka kulturalaren aurrean, agintari andaluziarra garaile aterako da lasaitasunez eta pragmatismoaz lagunduta. Errezeta ezberdinak, bai, baina helburu bera bilatzeko: gehiengo nahikoa lortzea ezkerra gainditzeko eta Vox gabe gobernatzeko. Morenok 'Feijoo efektua' aprobetxatu nahi du, inkesta guztiek adierazten duten bezala, baina PPko presidente berriak porrot egin dezake Galizian neutralizatu zuen eskuin muturra lehenengo unetik behar baldin badu bere proiektu nazionala bultzatzeko.

Ez dizuet Juan Espadasi buruz hitz egingo, ezezagunei buruz hitz egitea gustatzen ez zaidalako. Kontua da PSOEk oposiziotik ekin diola lehenbiziko aldiz Andaluziako hauteskunde-kanpainari eta ez datorrela iragarpen onekin. Gatzik gabeko hautagaia, mobilizatu gabeko hautesleria, 'ERE auzia'ren epaia puntu-puntuan... Hori gutxi izango balitz, aurreikusten den porrotak Espainia osoan ziklo politiko berri bat irudikatzeko arriskua dauka gainera. Bekainak alde batera utzita, Sánchezek Zapateroren aurpegi bera dauka orain. Eta Feijok, bitartean, eserita itxarongo du 'Rajoy' bat eginez; hau da, ezer ez.

Hilabeteak eman zituzten negoziatzen eta azkenean 14 minutu baino ez zitzaizkien falta izan koalizioa behar bezala erregistratzeko. Klaseko lan bat Moodle plataformara epez kanpo igotzen duen unibertsitateko ikasle bat bezala, PSOEren ezkerraldean dagoen espazio politiko hori azterketara iristen da orain gainditu gabeko gai askorekin. Yolanda Díazek nahaspila lotsagarri hori alde batera utzi nahi izan duen arren, Gobernuko presidenteordeak ezin izango du ekainaren 19ko boto-zenbaketatik libratu. Uztailaren 9an bere 'fronte zabala' aurkeztuko omen du, baina agian heriotzaz zaurituta helduko da.

Unidas Podemos-IU-Sumar-Frente Amplio-Por Andalucía-Espialidoso hautagaitzaren atzera egiteak eta Ciudadanosen hekatonbeak (hainbat zundaketaren arabera, desagertzeko zorian dago) 'politika berria'ren amaiera ziurtatuko lukete. M-15arekin iritsi zen, birsortze aire horrekin, benetako demokrazia aginduz... Eta azkenean betikoak baino okerragoak izan ziren. Pablo Iglesias eta Albert Rivera dena aldatzeko asmoz etorri ziren, baina azkenean euren buruak baino ez zituzten aldatu. Tira, euren bizimodua, euren etxeak eta euren bikoteak ere aldatu zituzten. Eta, zorionez danontzat, azkenean euren lanpostua ere aldatu egin zuten.

Juan García-Gallardok desgaitasuna duen diputatu sozialista baten kontrako hitzak erabiliz, ikusteko dago ea gainerako alderdiek Vox alderdi normal bat izango balitz bezala tratatzen duten. Eskuin muturrak eskura dauka bere bigarren gobernu autonomikoa, administrazio horiek itxiko dituela agindu duen arren. Dena PPk hartzen duen jarreraren araberakoa izango da, eta, oraingoz behintzat, ez da argia izan. Baina, era berean, ezkerraren erantzukizuna ere aztertu beharko da.

• Temas
• Politica
• Andalucía
• Euskera
• Elecciones Andalucía 2022