Aitor Francesena surflariak AEBetako Irekia irabazi, eta Munduko zirkuitua bereganatu du

Aitor Francesenak AEBetako Surf Egokituaren Irekiko bosgarren edizioa irabazi du asteburu honetan, eta beste probatan lortutako emaitzei esker (Hawaiiko Waikikin lortutako bigarren postua kasu), munduko zirkuituko titulua bereganatu du. Itsuen kategorian lortu du garaipena surflari euskaldunak US Openen.

Kirolariak surf egokituko Espainiako txapelduna da, Munduko txapeldun izan zen 2016an eta 2020an, brontzea irabazi zuen 2017an eta laugarren izan zen 2018an eta 2021ean. Hori nahikoa ez balitz, erronka berri horrekin bat egin nahi izan du: Adaptive Surfing Professionals World Championship Tour delakoarekin, non 16 herrialdetako 90 surflari baino gehiago bildu diren, alegia.

Oraingo lorpenari dagokionez, AEBetako Surf Egokituaren Irekiko bosgarren edizioa irailaren 8tik 11ra jokatu dute, Oceanside Pier-en, Kalifornian. Ekitaldia kaiaren iparraldean egin da, olatu honek aukera gehiago eskaintzen baititu emaitza altuagoak eta lehiakideentzat olatu zirraragarriagoak lortzeko. Esan beharra dago txapelketa honek une historiko bat eskaini duela surf egokitu profesionalean, izan ere, 2022ko AASPeko munduko txapeldunak bederatzi dibisiotan koroatu dira, eta horrek 30.000 dolar baino gehiago eman ditu sarietan. Eta hori aurrerapauso garrantzitsua izan da kirol honen profesionalizazioan.

Francesena, beraz, denboraldi bikaina egiten ari da. Aurten beste garaipen batzuk lortu ditu, Abanca Pantin Classic-en, esaterako, joan den uztailean. 52 urterekin ez zaio burutik pasatu ere egiten taula zintzilikatzea. Eta orain, Munduko Txapelketan garaipena berreskuratzeko eta olinpikoa izateko erronka du. Izan ere, surfa 2021ean Tokion programa olinpikoan sartu zenetik, mareen teoriko honek, maisu, entrenatzaile eta erreferente denak, hurrengo Jokoetan olatuen gainean lehiatzea besterik ez du buruan.

«Ez dut uste Paris 2024rako surf paralinpikoa homologatuko dutenik, gauza horiek poliki doaz. Adin bat daukat, ahalik eta gehien zaintzen saiatzen naiz, eta gorputzak emango du eman beharrekoa. Baina gorputzak eta buruak eusten badidate, Los Angelesen egongo naiz 2028an, lehiatzen eta dena ematen» esan du askotan 'Gallo' ezizenez ezaguna den kirolariak.

1970ean Zarautzen jaioa, Glaukoma diagnostikatu zioten 14 urterekin, eta eskuineko begia galdu zuen, ebakuntza ugariren ondoren. Hala ere, ez zion utzi surfa egiteari, bere bizimodu bihurtu arte.

Aitzindaria izan da beti. Estatu mailan kirol honetako lehen eskola ireki zuen 1988an, Zarautzen. Estatuko lehen surf entrenatzailea izan zen, eta bere irakaskuntza metodoa gaur egun ere erabiltzen da ia eskola guztietan. Besteak beste, Aritz Aranburu, Mario Azurza eta Axier Muniain entrenatu ditu, eta estatuko hautatzaile izandakoa da.

2012an olatu handi batek jo eta ezkerreko begia txikitu zion, erabat itsu geratuz. Ospitaletik atera eta hiru hilabetera, ordea, berriro surfean hasi zen. Taula zabal eta olatu txikiekin hasi zen, ondoren taula estu eta olatu handiagoetara pasatzeko.

Bere gidariak uretara sartu aurretik eta behin zutik jarri ondoren dauden baldintzak azaltzen dizkio, eta gero berak bakarrik maniobratzen du. Aitor Francesena bere energia eta bizitza-filosofia ederto igortzen duen pertsona da. Bere helburua bizitza topera bizitzea dela dio, itsasoaz eta naturaz modu jasangarrian gozatuz: «Inoiz ez diot surfean aritzeari utzi, lehen ikusten nuenean, eta orain ere ikusi ezinik nagoenean. Zerbait gustatzen bazaizu, probatu eta praktikatu egin behar da». Argi dago bere bizitza filosofiak ez diola gaizki funtzionatzen.

• Temas
• Euskera
• Surf