Agur esaiozu urteari Aiko taldearekin kantatuz eta dantzatuz Campos Antzokian edo modu birtualean

AIKO Taldeak Gabonak Dantzan programatu du. Urtea kantuz eta dantzaz agurtzeko jarduera multzoa da, aurrez-aurreko eta jarduera birtuala uztartzen dituena. Presentziala Bilboko Campos Eliseos Antzokian ospatuko da eta txikienei zuzenduta dago. Birtuala, berriz, Youtubeko kanalaren bidez eskainiko da, erromeria, hitzaldi bat eta tailer bat barne.

Oporraldia aprobetxatuz, musikarien eta dantza maisuen kolektiboak txikienak dantzaren munduan sartzeko esperientzia arrakastatsua berriz programatzea erabaki du AIKOk. 'Kulunkaz-Gure lehen pausoak dantzan' ekimena helduak txikienen imitazioaren erreferente bihurtzeko proiektua da. Jolasen eta jolas-ariketen bidez, belaunaldi berriei dantzarako zaletasuna transmititzeko tresnak ematen zaizkie.

Baina noiz gozatu ahalko dugu ekimen interesgarri honetaz? Kulunkaz abenduaren 27an, astelehenean, egingo da Bilboko Campos Antzokian, ordubeteko bi tailerretan. Lehenengoa, 17.00etan, 0 eta 2 urte bitarteko umeentzat, eta bigarrena, 18.00etan, 3 eta 6 urte bitartekoentzat. Lehenengoaren kasuan, nagusiki helduentzat diseinatutako jarduera bat da: gurasoak, senideak, zaintzaileak edo irakaskuntzako profesionalak. Panpina batekin joan beharko dute praktikak egitera, baina umeekin ere joan daiteke. Saioan, musikarekin eta dantzarekin lehen kontaktuak landuko dira besoetan, motxiletan edo paseorako aulkietan dituzten umeekin.

Bigarren tailerra, aldiz, 3 eta 6 urte bitarteko haurrentzako pentsatuta dago. Heldu batekin joateko diseinatuta dago, dantzaren bidez komunikatzen ikasteko premisarekin, helduen munduaren imitazioa lehen haurtzaroan ikasteko bide nagusia dela oinarri hartuta. Hori guztia jolasen eta jarduera ludikoen bidez, horiek direlako, antolatzaileen arabera, dantza esperientzia atsegin gisa zabaltzeko tresnarik onena.

Bi tailerrak Amaia Elosegi dantzariak, dantza irakasle eta pedagogia musikalean adituak, emango ditu, Patxi Laborda dantzari, koreografo eta dantza maisuarekin eta Sabin Bikandi danbolin-jole eta dantza maisuarekin batera.

Plazak mugatuak dira, heldu bakoitzeko 10 euro ordaindu beharko da (tailerrerako sarreran ordaindu beharko da), eta interesatuek bulegoa@aikotaldea.eus helbidean edo 634 423 539 telefono-zenbakian eman dezakete izena.

Horrez gain, AIKO Taldearen Gabonetako ekintzen programazioan beste hiru jarduera izango dira, taldearen Youtubeko kanalaren bidez. Guztiak 19.00etan.

Hala, abenduaren 26an, igandean, 'Erromeria birtuala' izango da. Alvaro Garcia gitarran, Sabin Bikandi txistuan, Txus Aranburu teklatuetan eta Amaiur Cajaraville baxuan ariko dira musika jartzen, eta Katalin Zarate eta Patxi Laborda, berriz, dantzan ariko dira.

Abenduaren 28an, asteartean, dibulgazio-jarduerarako txanda izango da, musikari, organo-jotzaile eta Historia Garaikideko doktore eta etnomusikologian aditua den Aingeru Berguicesek emango duen hitzaldiaren bidez. Berguicesek bere ikerketa-ezagutzak eta -esperientzia partekatuko ditu, musika eta dantza tradizionalaren historia eta egungo errealitatea ulertzen laguntzeko.

Azkenik, abenduaren 29an, asteazkenean, 'Dantzan pandero kantuz' online tailerra antolatu da. Kantuaren eta panderoaren laguntzaz, dantza egiten ikasteko tailerra da. Alde batetik, mugimenduaren eta musikaren arteko harremana ulertu eta landu nahi du, eta, bestetik, abesten, jotzen eta dantzatzen gozatu.

• Temas
• Aiko
• Euskera