2023ko Bertso Eguneko saioetan parte-hartuko duten bertsolariak iragarri dituzte

2023ko Bertso Eguneko saioetan parte-hartuko duten bertsolariak iragarri dituzte. Izan ere, goiz eta arratsaldeko egitaraua ospatuko du 2023ko Bertso Egunak, bertsoz alaitutako bazkari eta afari ugari izango direlarik, baita bestelako saioak ere.

Urtarrilaren 28an Azpeitian ospatuko den hitzorduko ekitaldi guztietarako sarrerak jada erosgai daude Bertso Sarrerak atarian. Egitasmo hauxe Bertsozale Elkarteak atondu du, Azpeitiko Udalaren eta herriko hainbat elkarteren laguntzari esker. Eguna goizeko 11:30ean abiatuko da, kalerik kaleko poteoa egingo dutelarik. Ondoren, 14:30ean, bertso bazkariak gauzatuko dira Oilo Soro, Zulo Zabal, Ziripot, Oilagorra eta Txalintxo elkarteetan.

Bazkariotan saio libreak atonduko dituzte honako bertsolari bikoteek: Jone Uria-Sustrai Colina, Miren Artetxe-Saioa Alkaiza eta Jexux Mari Irazu-Unai Iturriaga. Era berean, bertso-saio musikatuan arituko dira aurrez aur Nerea Ibarzabal, Aitor Etxebarriazarraga, Beñat Gaztelumendi eta Maddalen Arzallus. Azkenik, beste bazkari batean gaia jarrita arituko dira Andoni Egaña eta Nerea Elustondo.

Arratsaldean ere beste poteo bat ospatuko dute eta, 21:00etan afaria egingo da Gipuzkoako udalerri honetako Elikagune zentroan. Afalostean, berriz, bertso ekitaldia egingo dute. Hor ere hainbat bertsolariz gozatzeko aukera izango dute bertaratzen direnek, hala nola, Maialen Lujanbio aurtengo Bertsolari Txapelketa Nagusiko txapeldunaz, Eñaut Martikorenaz, Ane Labakaz, Peru Abarrategiz, Illarregi anaiez edota Josu Aramendiz.

• Temas
• Azpeitia
• Euskera
• Bertsolaritza