K2ko neguko espedizioaren hasiera

Eta antza denez zerrenda hori handitu beharko da hemendik aurrera, orain espedizio komertzialak hasi direlako antolatzen neguan ere. Hala egingo du Seven Summit Treks Nepaleko agentzia handiak aurtengo neguan Pakistanen. Bertan, dakikezuenez, K2 mendi erraldoia dago, eta horixe da neguan igotzeko gelditzen den bakarra. Inor ez da alpinismoaren historia osoan bere gailur txikia neguan zapaltzeko gai izan. Bertan haizeterik bortitzenak erregistratu dira, bai eta muturreko tenperatu hotzak ere. Hortaz arrisku handiko bidaia da, baina halarik ere, badirudi fribolitatez bete dutela mendia, eta orain munduko alpinista guztientzat zabaldu dutela atea. Edonor joan daiteke horra, eskarmentua izan edo ez.

Nazioarteko espedizioa izango da Chhang Dawa Sherpak zuzenduko duena. Lankidetzan lan berbera egingo du Sergi Mingotek katalanak. Hamalau tontor guztiak egiteko lehiaketa pertsonala darama aurrera eskalatzaile katalan potenteak. Bi horiekin hogei alpinista baino gehiago joango dira Baltoro glaziarretik gora, azkenak, Arnold Coster eta Waldemar Kowalew eskarmentudunak, baina tartean dozena bat naziotatik gerturatuko dira mendizaleak, eta haiekin 15 sherpa ere bai.

Ampliar

Datorren hilean, abenduak 20, helduko dira Pakistaneko Islamabad hirira, baina lana hein batean aurreraturik dute, izan ere, egun hauetan, material pilo bat eraman dute zama-eramaileek K2ko kanpamentu nagusira, neguan ibilbide hori egitea askoz gogorragoa eta zailagoa baita. Izan ere, espedizio handi horietariko baten arazo nagusia logistika izaten da. Pentsatu behar da bi hileko egonaldirako hornidura dezente behako dutela alpinistek janariaren aldetik edota eskalatzeko beharko duten materialaren aldetik. Horrexegatik aurreratu dute udagoienean lana, neguan horixe guztia garraiatzea oso arriskugarria gerta baitaiteke zama-eramaileentzat.

Dena ondo bildurik eta paketaturik utzi behar izan dute, bertako ekaitzek eraman ez dezaten eta alpinistek bertaratzean sorpresarik har ez dezaten. Beno, sorpresak beti izango dituzte, neguan eta altueran inoiz eskalatu ez badute, jasango duten hotza pairaezina izango da eta. Neguak sorpresa asko gordetzen ditu, eta Karakorumekoak askoz gehiago.