Ondo pasa

Askotan bezala, orain penduluak beste aldera egin du, guztiz, ezin beste alderago. Orain legea ondo pasatzea da. Ez omen dugu zuzenean eta berehala plazerik emango ez digun ezer egin behar, horretara omen gara mundu honetara etorriak, ongi pasatzera, luzamendurik gabe eta salbuespenik gabe.

Dibertsioa omen da legea, jostaketa. Susmagarri gertatuko zara, zuk erabakita, lan neketsu bati ekiten badiozu, lan horrek gerora fruitu gozoak emango dizkizulakoan. Horrelakoetan esan beharko duzu gustura egiten duzula egiten duzuna, nekea ez dela neke, lana dibertigarria dela.

Edozerk behar du izan dibertigarri, hitzaldi batek, mitin batek edo unibertsitateko eskolak. Denak behar du dibertsio tanta bat edo, hobe, uholde bat. Ez dizu inork galdetuko hitzaldi hori interesgarria izan den ala ez, galdetuko dizute ea dibertigarria izan den.

Kirola izan daiteke salbuespen bakarretako bat, hor bai onartzen dela gaurko nekea biharko indarra dela, batez ere lehia batean garaile suertatzen bazara. Hortik kanpo apenas dagoen lekurik ondo pasatzeko egiten ez den zerbaiterako. Filmak, liburuak, kontzertuak, eskolak. Dibertigarriak ez badira, ez dute ezertarako balio, are gehiago, norbaiti zerbait serioa dela esaten badiozu, ulertuko du aspergarria dela, baztergarria.

Gainera, duela urte mordoxka muturrera heldu zela zirudien penduluak egunero egiten du harago, fisikaren lege guztiak hautsi arte, orbita galdu eta zeru berrien bila abiatzen den satelite zoroa balitz bezala.

Barkatu, irakurle, lerro hauek irakurriz dibertitu ez bazara.