Zure burmuinak graduazio baxuko ardoa nahiago du

Hogei bat pertsonak parte hartu dute proiektuan. Eta boluntario hauek, binakako taldetan, bi ardo probatu zituzten. Bi edariek mahats berdina, urte bera eta azidotasun berbera zituzten. Desberdintasun bakarra? Graduazio alkoholikoa. Hor dago gakoa. Dastaketaren ostean, Basque Center of Cognition, Brain and Languageko espezialistek erresonantzia magnetiko bati esker aztertu zituzten burmuinak. Gero, ondorio harrigarriarekin topatu ziren: "burmuinak atentzio handiagoa jartzen die gradu alkoholiko baxuko ardoei". "Usaia eta zaporea bezalako alderdiei jaramon handiagoa egiten die burmuinak. Plazer handiagoa aurkitzen du, beraz, graduazio txikiko ardoetan", azaldu du Frost irakasleak.

Azken urteotan, produktoreek "ardo potenteak" prestatzen dituzte, adierazi du Frostek. Orain dela 30 urte, %12koak egiten ziren, orain berriz, 14-15ekoak. "Industria ardogileak kontsumitzaileen gustuak ezagutzen dituela uste du. Baina suposizioak egitea ez da metodo egokiena, eta guk burmuinean zer gertatzen den aztertu dugu. Horri esker, produktoreek badakite berez graduazio baxuagoa nahiago dugula", dio irakasleak.