Gipuzkoan da 20. Korrika

Hitzordu guztiak izango dira garrantzitsuak Korrikaren zain dauden herrietan, baina bi nabarmendu daitezke euskararen aldeko lasterketaren seigarren egunean: mugan, Bidasoa ibaiaren gainean, ordua jarrita daukana, eta Donostiarekin duen zita.

1.198 kilometroa, 15:30ak aldera Hendaiako tren geltokitik Irungo Ficobara arte egingo dena, «geroaren lehen urratsa» izango da AEKren ustez. «Euskararen normalizazioan bidea irmoki urratzeko garaia da, eta uste osoa daukagu, Euskal Herrian hizkuntzen eta hiztunen aukera berdintasuna erdietsiko dugula, euskararen lurraldean horretan aritzen garenok elkarlanean eta auzolanean jarduten badugu. 1198. kilometroan geroaren lehen urratsa irudikatuko dugu, administrazioek eta gizarte-eragileek elkar hartuta», adierazi du AEKk ohar baten bidez.

Izan ere, AEKk gonbidatu ditu kilometro horretan parte hartzera euskararen lurraldeetako erakunde guztiak eta euskalgintzako eragile nagusiak, eta denen artean beteko dute zentzuz eta edukiz Korrika hedatzen ari den 'BaTzuk' hori.

Han izango dira, besteak beste, Eusko Jaurlaritzako Kultura eta Kuzkuntza Politikako sailburu Bingen Zupiria; Nafarroako Gobernuko kontseilari Ana Ollo; Iparraldeko Euskararen Erakunde Publikoko Mathieu Bergé; Markel Olano Gipuzkoako Diputatu Nagusia eta Mikel Irizar Aldundiko Hizkuntza Berdintasuneko zuzendaria; Arabako eta Bizkaiko Aldundietako ordezkariak; AEKko Mertxe Mujika; Kontseiluko Paul Bilbao; Ikastolen Elkarteko Koldo Tellitu; Topaguneko Jasone Mendizabal; UEMAko Josu Labaka; Euskal Herrian Euskarazeko Azaiz Gartzia; Euskaltzaindia, Elkar, Elhuyar, Berria, IKA, Sortzen, Konfederazioa, IKA... Euskararen inguruan inoiz ikusi den ordezkaritzarik zabalena, ezbairik gabe.