Amaiera Bilbotar erara

Korrika bera Areatzan bukatuko bada ere, sei gunetan izango dira ikuskizunak, Koldo Agirregomezkorta jaiaren arduradunak azaldu duenez. Oinarrizko zerbitzuak (komunak, informazioa...) ez dira falta, ezta tabernak, Korrika denda, tonbola, tailerrak, jolas guneak, umeen txokoa eta bestelakorik ere. Guneak San Nikolas elizaren aurrealdean, Arriaga plazan, Erripan, Bilbo Zaharrean eta Zazpi Kaleetan kokatuko dira, nagusia Areatzan bertan paratuko delarik. Musikan oinarritutako Iluntzera arteko jarduerak hartuko dituen gazte gunea ere hor egongo da. 14:30etik 20:00etara bitartean Xutik, Eskean Kristo, Betagarri eta Ze Esatek ariko dira gune horretan. Gainerako guneetan ere eguerdi-arratsalde partean izango dira animazioak. Goiztiarrena San Nikolasekoa izango da, han egingo baitzaio ongi etorria lekukoari 12:30ean. Gune horretan Korrika Abesti taldea, Kherau, Anje Duhalde eta erromeria girotuko duen Izerdi Gorria arduratuko dira musikaz. Bilbo Zaharreko gunean, berriz, Sutan, Elortegi anaiak, Revolta Permanent eta DJ Elepuntoren eskutik helduko da musika. Bereziki haurrei eskainitako gunea ere bada, Erripakoa; hor paratuko dira puzgarriak eta Irrien Lagunen gunea, besteak beste.