Badugu Jaurlaritza

Gasteizen jeltzaleek eta sozialistek lortu duten akordioak ez du inor baztertzen. Areago, eragile gehiagorekin elkar ulertzeko aukera zabalak eskaintzen ditu. Maila ekonomiko eta sozialeko lehentasunei premiaz heltzeko asmoarekin batera, autogobernuari eta bakegintzari dagokienez aurrerapauso erabakigarriak egiteko borondatea agerikoa da Jaurlaritzako bi alderdien aldetik. Gainera, Gernika-Lumoko Batzar-Etxean Soraya Sáenz de Santamaría Espainiako presidente ordeak adierazitakoek nolabaiteko inflexio puntu bat adieraz dezakete gobernu bien arteko harremanetan. Rajoyk eta PPk badakite Euskadin landu daitekeen eredua Kataluniako egoerari irtenbideak bilatzeko ere baliagarri izan litekeela neurriren batean, hango eta hemengo errealitateak ezberdinak diren arren. Lurralde egituraren inguruko arazoak nabarmenenak diren bi erkidegoetan ausart jokatu beharko dute alde guztiek, gehiengoen eskaerei muzin egin eta egoera usteltzen uzteak ezer konpondu beharrean dena gaiztotzen duelako.

Barrura begira ere, posible eta beharrezkoa da elkarrizketa emankorra abiatzea. EH Bildu, esaterako, funtsezko eragilea da euskal politikagintzan eta, errealismoaren aldeko apustuan sakontzen duten neurrian, badago zer landu eta zer adostu eurekin. Ezker abertzaleak luzaroan euskal gizartearen gehiengoaren aurka ekin dio oinarri-oinarrizkoetan. Baina, aro berri honetan, Otegik Ertzaintzaren inguruan esandakoetan-eta oraindik gabeziak agerikoak diren arren, elkarlanerako ahalegina nagusitu behar da. Elkarrizketarako saiakera askotarikoek, elkarren osagarri direnek, eraman ahal izango dute Euskadi agertoki berrira, bakea eta bizikidetza mamiz betetzera eta autogobernu esparru berri, eguneratu eta sakondua abiatzera. Eta horrek, jakina, ezinbesteko du denen batuketa, alde guzti-guztien konpromiso zehatz eta benetakoa.

Bide hori egiten den bitartean, egungo Estatutuan aurreikusitakoak bete daitezen da helburua, etor litezkeen hitzarmen berriei sinesgarritasuna emango liekeena. Izan ere, indarrean dagoena ez osatzea, euskal herritarren borondatearen isla den lege organiko bat ez betetzea, aurrekari ezin txarragoa eta arriskutsuagoa da etorri behar duenari begira. Autogobernua legez dagozkionekin sendotzea nahitaezko betebeharra da, eta horretan ez dago azoka moduko baten arabera jokatzerik. Josu Erkorekak ezin hobeto ezagutzen ditu betetzear daudenen xehetasun guztiak, eta bermea da horri behingoz heltzeko. Alde horretatik, Jaurlaritza berriaren egitura eta sail bakoitzaren izena bera ere ez dira kasualitatezkoak, lehentasunen adierazgarri baizik. Autogobernu eta bakegintza mailakoez gain, esparru ekonomiko eta sozialekoak ez dira nolanahikoak, eta Abiadura Handiko Trena abian jartzeari dagokiona ere estrategikoa da. Honakoa ez da, beraz, asmoen inguruan osatutako Jaurlaritza, betebehar zerrenda zehatz bati eutsi gura diona baizik.

Euskarari buruzkotik, nabarmentzekoa da Kultura eta Hizkuntza Politikarako berezko saila bereiztu izana. Horiek gabe jarraituko du Cristina Uriartek aurrerantzean, Hezkuntzaz bete-betean arduratuta. Bingen Zupiriak hartuko du gainerako arloen ardura, orain arte egindakoak bultzatu eta dinamizatzeaz gain asmo berriei ekiteko. Ibilbide luzekoa da sailburu berria, Jaurlaritzan bertan zein hedabide publiko eta pribatuetan lan oparoa egindakoa. Adituenaren pare ezagutzen ditu kulturaren eta euskararen erronkak eta nondik norakoak, eta zalantzarik ez dago eraginkor ariko dela, kudeatuko dituen horien onerako.

Legealdi berria aukeraz beteta dator, eta horien neurriko Jaurlaritzari egokituko zaio guztiak bideratzea, errealitate emankor bihurtzea. Euskadiko zein Estatuko testuinguru politikoak lagungarri izan daitezke horretarako, horiek egoki baliatzen asmatuz gero. Gernika-Lumoko Batzar-Etxeko zin egite saioa, sinbolismoz eta keinuz betetakoa, ez da abiapuntu makala. EAJren lidergopeko koalizioa, Urkullu lehendakaria buru duena, ildo, helburu eta filosofia argikoa da, sakoneko hainbat arazo eta erronkari heldu eta elkarrizketa eta konpromisoa goiburu izango dituena. Eta hor Legebiltzarreko talde politiko guztientzako eta bestelako eragileentzako lekua ere badago, bakoitzaren ekarpenaren araberakoa.