Usain Bolten finalean zale batek egindako erronka

Aurtengo Olinpiar Jokoek irudi oso bitxiak erakusten dizkigute Rio de Janeiron, baina baita mundu mailan hauek jarraitzen dituzten zaleen artean ere. Horietako baten protagonista dugu Usain Boltek 100 metroak korrika egin baino lehen Rubikeko kuboa osatzeko erronka burutu nahi izan duen gaztea.

Bere abilezia erakusteko telebistaren aurrean kokatu eta koloreak batzeari ekin zion Usain Bolt, Justin Gatlin eta gainontzeko korrikalariak aurreko igandeko proban lasterka hasi bezain pronto.

Usain Bolt, 100 metroko hiru lasterketatan jarraian titulu olinpikoa eskuratu duen lehendabiziko atleta bihurtu da Brasilen, 9.81ko markarekin. Hala eta guztiz ere, zaleak, jamaikarra baino bizkorragoa zela erakutsi zuen Rubikeko kuboa osatzerako orduan.

Izan ere, kuboa airera jaurtitzeko denbora soberan izan zuen erronka irabazi zuenaren seinale, Boltek jomuga pasatu zuen unea telebistaz jarraitu ostean.