Jazz doinuak badatoz Euskadira

Getxoko Jazzaldiak uztailaren 3an, ostirala, bide erdia gaindituko du, Joe Lovanorekin. Lovano saxofoi-jotzaile tenorra da, jazzaren arloan erreferentziazkoa, berritzailea eta inprobisatzaile handia. Uztailaren 4an, larunbata, protagonista Stanley Clarke izango da. Clarke jazz rocka esaten zaionaren ordezkari karismadunenetako bat da, aitzindaria fusioaren ikuspegian. Jaco Pastoriusekin batera, Clarke musikari giltzarrietako bat izan da baxu elektronikoa jazzaren arloan sartzean. Jazzaldiaren amaiera igandean ekarriko du Madeleine Peyrouxek, XX. mendearen amaieran jazzaren arloan sortu zen abeslari arrakastatsuenetako batek.

Uztailaren 14tik 18ra jazzak Gasteizera egingo du bidaia. Mendizorrotzako kiroldegian Tina Brown and the Gospel Messengers arituko dira 14an, José James eta Hiromi The Trio Project 15an, Brad Mehldau Trio eta Chris Potter, Dave Holland, Lionel Loueke and Eric Harland 16an, Anat Cohen Quartet eta Estrella Morente-Niño Josele 17an eta 18an, egun handia, Chick Corea eta Herbie Hancock handiekin. Principal Antzokian Jazz del Siglo XXI zikloa egongo da, betiko moduan. Informazio guztia, dena den, www.jazzvitoria.com web orrian eskuratu daiteke.

Azken Jazzaldia Donostiakoa izango da. Programa luzeena dauka, hainbat eszenatokitan banatua. Jamie Cullum izarrak, adibidez, hiru emanaldi egingo ditu. Kursaaleko terrazetan ibiliko da disc-jokei modura, gero bakarka abestuko du Kursaal Auditorioan. Eta azkenik, Trinitate enparantzan taldearekin joko du. Urtero bezala, Heineken Jazzaldia Jazz Band Ball-arekin hasiko da, uztailaren 22an. "Festa horretan hainbat estilotako talde eta artistek hartuko dute parte eta, orokorrean hartuta, gustu, adin eta interes guztiei zuzendutako saioa izango da", esan dute antolatzaileek. Kursaaleko terrazetan eta Agertoki Berdean, sarrera dohainik dela, rythm & blueseko talde ospetsuenetako bat igoko da oholtzara: Earth, Wind & Fire Experience,. Tartean izango da Jimmy Cliff ere, reggaeko mitoetako bat, estilo horretako izen ospetsu eta prestigiotsuena. Eta bertan arituko dira, gainera, egungo jazzeko 7 instrumentista onenetakoak biltzen dituen super-talde bat, The Cookers: Donald Harrison eta Billy Harper, saxoak, Dan Weiss eta Eddie Henderson, tronpetak, eta George Cables, Cecil McBee eta Billy Hart-ek osatutako erritmo-hiruko paregabea.

Uztailaren 23tik aurrera, Trinitate Enparantzan, lau emanaldi bikoitz eskainiko dira. Ostegun gauean, uztailak 23, Sílvia Pérez Cruz eta Zaz, duela hiruzpalau urtetik hona Espainian eta Frantzian inpaktu handiena izaten ari diren emakume abeslarietako bi. Ostiralean, hilak 24, Jamie Cullum bere talde osoarekin, eta haren aurretik, euskal eta poloniar musikari batzuen artean Jazzaldi honetarako sortutako talde bat: Iñaki Salvador-ek eta Andrzej Olejniczak-ek Maciej Fortuna tronpetista gonbidatu dute beren taldera, eta haiekin arituko dira Gonzalo Tejada eta Borja Barrueta ere. Larunbatean, hilak 25, Trinitate Enparantzan izango da berriro iaz, leku berean, halako txalo erauntsiak jaso zituen Dee Dee Bridgewater abeslaria; oraingoan New Orleanseko musikari talde bat izango du lagun, Irvin Mayfield tronpetista handiaren zuzendaritzapean. Laguntzaile horiekin dama abeslari eta show-woman apartak New Orleanseko musika tradizionala eta betikoa eskainiko digu. Baina, haren aurretik, 2014ko disko interesgarri eta bizienetako bat argitaratzeko gai izan den jazzeko hiruko bat entzuteko parada izango dugu: The New Standard Trio, Jamie Saft teklista handia buru dela, Steve Swallow eta Bobby Previte beteranoen laguntzarekin. Trinitate Enparantzako saioak amaitzeko, igandean, hilak 26, Melody Gardot.

Agur handia

Lau emanaldik osatuko dute ere Kursaal Auditorioko programazioa. Lehenengoan, esklusiba zorrotzean, ostegun arratsaldean, hilak 23, Jamie Cullumen bakarkako kontzertua, pianoa eta ahotsa. Ostiralean, uztailak 24, jazzeko beterano handietako bat, mito bizi bat, Benny Golson saxofonista. Larunbatean, hilak 25, ametsetako laukote bat, egungo jazzeko lau musikari gailenek osatua: Joshua Redman saxofoi-jotzailea eta The Bad Plus hirukoa. Eta igandean, 26, azkeneko traka! Hona nortzuk osatzen duten hiruko sinesgaitz hau, John Zorn, abangoardiako jazzeko lider handia eta joera berri askoren sortzailea, duela bi urte Masada Marathon emanaldiarekin zeharo hunkitu gintuen musikaria, Bill Laswell baxu-jotzaile eta disko-ekoizlea eta Slayer-en bateria-jotzaile izandako Dave Lombardo kubatarra: Blade Runner Trio, Donostian soilik. Informazio guztia http://heinekenjazzaldia.com/ web orrian dago.