Eñaut Elorrietaren deserria, bukatzear

"Euskal antzoki garrantzitsuenetan izan gara azken bi sasoietan", azaldu du. Victoria Eugenia, Arriaga... 50 kontzertu egin ditu guztira 'Deserriko kantak' jendaurrean aurkezten. Honetan, Sarrionandia, Benedetti, Oliver, Harkaitz Cano eta Bernardo Atxaga bezalako autoreen testuak egokitu zituen, bere erara egindako moldaketetan.

"Deserri partikularra izan zen diskoaren grabaketa, egia esan, benetako bizi-lana guztiz", aipatu du musikariak. "Baina orain garai honi agur esateko momentua iritsi dela uste dut. Eta horregatik, jendearekin ospatu nahi dut bizi izandako guztia". Elorrietak bere burua "zortedun" ikusten du. "Antzokiak betetzen ditut, gustokoen dudana egiten dut eta gainera entzuleen babesa daukat. Ezin diot bizitzari gehiago eskatu", azaldu dio elcorreo.com-i.

'Deserriko kantak' bere bakarkako lehen lana da, 2013an kaleratutakoa. "Ertz guztietatik begiratzen diot deserriari diskan. Euren azalean bizi dutenen ikuspegitik, eta baita deserri politikoaren aldetik", aipatu du Elorrietak. Bere zuzeneko emanaldiak "zainduak eta bereziak" direla defendatzen du. "Kantek eboluzioa izan dute bi urteotan. Era desberdinetan planteatzen ditut orain. Gainera, ez da berdina herriko jaietan jo edo Arriagan jotzea. Leku batzuek interpretazio jantziagoa eskatzen dutela dirudi", uste du abeslari bizkaitarrak. "Dena den, pieza hauek egin nituenan ez nuen uste ibilbide hain luzea izango zutenik. Hasieran, egia esan, beldur nintzen. Aizu Eñaut: agian babestuegiak daude kantuak, esaten nion nire buruari", esan du. "Erabaki guztiak nik hartu behar nituen. Ken Zazpirekin era desberdinean egiten dut lan".

Eta 15etik aurrera? "Lanean jarraituko dut. Poesia asko irakurri dut azken hilabeteotan", aurreratu du. "Agian kantu intimoagoak egiteko arantza daukat oraindik", dio Elorrietak. "Esplorazio bide berri bat izan daiteke. Ahotsan oinarritzen diren konposizioak". Ikusiko da.