Zer irakurri? Hona hemen adituen gomendioak

'Ez tiro egin anbulantziei' (Mikel Ayllon). XVI. Igartza Saria lortu zuen Ayllonek eleberri honekin. "Kartzelan azaldu da bat-batean Gerard, zergatik ez dakiela. Sartu duten mundu krudel hori ulertu ezinik emango ditu egunak, banaka desagertzen hasiko diren kidez inguraturik: Fred, Karim, Telmo, Montag Guztien arteko lokarria eta egoera ulertzeko giltza dirudi Sylviek, Gerardek arestian ezagututako emakume misteriotsuak. Nor dira mundu zaharra lurperatu nahi luketen horiek? Mundu berria jaio ezinik dabilen argilun honetan, ez ote da munstroz beteko ingurua? Eleberri ausart bezain aberatsa gauzatu du Mikel Ayllonek Igartza sariaren laguntzaz. Izua eta desolazioa nagusi diren gizarte distopiko batean, elkartasunaren ametsari eta edertasunaren ilusioari eutsi nahi liekete pertsonaiek, nahi horrek nora ezean ibiltzera bultzatzen dituen arren. Atzekoz aurrera ordenaturik dago kontakizuna: kartzela eta heriotzatik abiaturik, haien aurreko maitasun istoriora eta borroka asmoetara. Horrela, amaierara iristen denean historiaren hasieran egongo da irakurlea», deskribatu dute Elkarreko sustatzaileek.

Gasteizko Zuloan (Correría, 24), bi ale hauek proposatu dituzte:

'Yo, asesino' (Antonio Altarriba eta Keko). EHUko irakasle izandako Antonio Altarribaren komiki hau, Kekok marraztua, liluragarria da. "Hiltzea ez da krimena, erailketa bat artea da", dio istorio honen protagonistak, Gasteizko Fakultateko irakasle batek. Euskal errealitatea deskribatzen du, ildo honen inguruan, Altarribak. "ETAren eragina, mundu akademikoa, hainbat aspektu analizatzen ditu begirada zorrotzarekin", azaldu dute Gasteizko Correría kaleko dendan.

'La balada del norte' (Alfonso Zapico). Astiberri bilbotar etxeak argitaratutako komiki berria "aurtengo 'bombazo' delakoa izango dela" uste dute Zuloan. 232 orriko alea da, Espainiako Gerra Zibilaren aurreko urteetan kokatua. "Asturiaseko 34ko iraultza deskribatzen du, Errepublika garaia eta ikatz meategietako errealitatea".

Bilboko Cámarako (Euskalduna kalea, 6) Javier Cámarak, azkenik, honako lau obrak gomendatu dizkigu:

'Un espía entre amigos: La gran traición de Kim Philby' (Ben Macintyre). Idazle britaniarraren saiaketa historiko honek sobietar agente bikoitz baten istorioa kontatzen du. "Gerra Hotza garaian kokatzen da. Hogeitamar urtez MI6aren parte izan zen sobietar batez hitz egiten du Macintyrek liburuan. Txundituta uzten zaitu. Benetan", dio Cámarak. Azkar irakurtzen den saiakera horietakoa da. "Nobela dirudielako", nahiz eta benetakoa izan. "Protagonista iruzurren txapelduna da".

'La sociedad de coste marginal cero' (Jeremy Rifkin). Jeremy Rifkinen liburu hau ekonomia eta soziologia apaletan aurkitu daiteke. Teoriko hau Foundation on Economic Trends erakundearen presidentea da gizona, eta hainbat obra argitaratu ditu. Honetan, bere ustetan munduan garatzen ari den modelo ekonomiko berri batez mintzatzen da. "Energia forma eta komunikatzeko berrikuntzak datozenean mundua erroz aldatzen dela defendatzen du", azaldu du Cámarak. Orain, 'gauzen interneta' delako kontzeptuaz aritzen da. "Honek, idazlearen hitzetan, edozein produkzioren kostu marjinalen beherakada dakar. Eta horren ondorioz, oparotasunaren gizartea sortuko dela dio". Kapitalismoaren desagertzea iragarri du Rifkinek gainera.

'Negro como yo' (John H. Griffin). 1960an, idazle honek ameriketako beltzak nola bizi ziren dastatu nahi zuen. Horretarako, bere larruazala ilundu zuen eta Missourira joan zen. "Liburuan bere eskarmentua kontatzen digu. Honakoa defendatzen du Griffinek: errealitatea ez duzu ezagutzen zure azalean probatzen duzun arte", azaldu du Cámarak.

'La constelación del perro' (Peter Heller). Distopia "oso interesgarria" da, "Cormac McCarthyren 'La Carretera'ren antzekoa, baina itxaropenez betea", deskribatu du Cámarak. Blackie Books argitaletxearen liburu hau honek honakoa kontatzen du: "Gure behar sozialak nola bete munduan pertsonarik geratzen ez denean".