Musikarien hazitegia Betoñon

Izen emateak, apirilaren 21era harte

Gasteizen erroldatutako musikari orori zuzenduta dago ekimena; apirilaren 21era arte eman ahalko dute izena, udalaren web-orrian. Ondoren, lekuak esleitzeko zozketa egingo da, apirilaren 22an; ateratzen den zenbakitik aurrerako hurrenkeraren arabera banatuko dira lekuak. 2015eko maiatzetik 2016ko urtarrilera arte erabili ahalko dira aretoak.

Bi motatako erabilerak bereiziko dira: bi pertsonak edo gehiagok osatutako musika taldeak, eta banakoak. Taldeek izango dute lehentasuna, zerbitzua hobeto aprobetxatzearren. Astean gutxienez 2 ordu erabili beharko da aretoa, eta pertsona edo talde berak ezingo du 4 ordu jarraian baino gehiago erabili.

Talde Guneren aretoak guztiz domotizatuta daude: sarbide-kontrola dute, giltza elektroniko programagarrien bidez; segurtasun sistema adimentsua; elektrizitatearen eta alarmaren deskonexio automatikoa; telebista-zirkuitu itxia, urrutiko ikuspenaz, etab.

Aretoek 20 metro koadro inguru dute, eta intsonorizatuta daude; akustika-egokitzapenaz, alarmaz, ADSLez, suteen kontrako neurriez eta bestez hornituta daude. Gainera, instalazio orokorrak dituzte: komunak, bulegoa, atseden gela, jaki hotz eta beroen makinak, zama-igogailua, etab. Enpresako langileak arduratzen dira publikoaren arretaz bulegoko ordutegian, eta garbitzeko eta mantentzeko langileak ere badira. Talde bakoitzari giltza elektronikoa emango zaio, eta horrek sarrerak erregistratuko ditu.