Andra Mari Zuria, ebakuntza-gelara

Jatorrizko irudia kendu zutenean, argazki bat jartzea izan zen hartutako lehen erabakia. Baina gero 900 kiloko erreprodukzio bat egitea adostu zen. Gaur egun duguna, 214x69x54 zentimetroko neurrikoa. Originala (1788tik 2007ra egon zen San Migel elizan), orain, ebakuntza-gelatik pasako da. Apezpikutzak, Espainiako Gobernuak eta Andra Mari Zuriaren Kofradiak askotan eskatu dute tailuaren 'lifting'-a. Eta aste honetan jakin izan denez, Espainiako Kultura Sailak 72.000 eurotik gora ordainduko du desio hau asetzeko. "Oso pozik gaude. Andra Mari Zuriaren irudia gasteiztarren bizitzetara bueltatu nahi dugu", esan du Gobernu espainolaren EAEko ordezkari den Carlos Urquijok.

Berritze lanek zazpi hilabete iraungo dute, eta Arabako Foru Aldundiak gainbegiratuko ditu. Izan ere, Foru Aldundiak gorde du ehun urtetik gorako jatorrizko tailua azken urteotan, bere Zaharberrikuntza Zerbitzuan. Eta gero? Irudia ez da San Migeleko horma-hobira bueltatuko, hori ziur. Kofradiak erabakiko du non ipini. Seguru asko, eliza barruko kapera txiki batera eramango dute.

"XX. mendearen hasieratik, irudiaren arte-alderdiari buruz dagoen bibliografia ugaria izan da", Kofradiak dioenez. "Emilio Encisok honela deskribatu du: harri polikromatuzko irudi ederra da, zutikakoa, liraina, luzatua eta neurrizkoa", "tunikak toles lodiluzeak ditu, eta tolesak bilduta daude, oinutsik dauden oinen gainean angelu nabarmenak osatuz; zapatak, berriz, biribilak dira, eta puntazorrotz samarrak". Laster, apain-apain izango da berriro Andra Mari Zuria.