Juan Pérez Floristán, Vital Kutxaren astearte musikaletan

Juan Pérez Floristán pianista gaztearen kontzertua hartuko du gaur (20etan), Vital Kutxa Fundazioa Gelak, Kutxaren Gizarte Ekintzak antolatzen dituen Astearteetako Musikaldien barruan. Musikari sevillarrak joko duen kontzertuan Schumann, Mozart, Bartók eta Beethoven musikagileen zenbait pieza eskainiko die entzuleei.

Musika gazte horrek (Sevilla, 1993) amari María Floristán eta Ana Guijarrori zor die pianorako zaletasuna, nahiz eta beraren prestakuntza Espainiako, Suitzako eta Alemaniako zenbait lekutan garatu den eta, besteak beste, Elisabeth Leonskaja, Daniel Baremboim, Horacio Gutiérrez, Nelson Goerner, Joaquín Soriano edo Oxana Yablonskaya maisuekin. Orobat, azken urteotan Pérez Floristán Reina Sofía Musika Eskola Nagusiko ikaslea ere izan da, Fundación Banco Santander Piano katedran, eta gaur egun Berlineko Hochschule für Musik Hanns Eisler eskolan ari da bere musika-ikasketak osatzen. 2011n, artean Madrilen zela, Ikaslerik Bikainena aipamena jaso zuen.

Errezitaldirako sarrerak zortzina euroan

Bere karrera oraindik laburrean jarduera ugaria garatu du bakarlari gisa zenbait orkestra nabarmenetan: Malmö Symphony Orchestran, RTVEren Orkestran, Sevillako Real Orquesta Sinfónican edo Espainiako Gazte Orkestra Nazionalean, besteak beste, eta musikaldi askotan parte hartu du, batzuk aipatzearren: Santanderreko Encuentro de Música y Academia, Moskuko Spivakov Musikaldia, Alemaniako Ruhr Klavier Festival edo Gstaad-eko (Suitza) Sommets-Musicaux. Beste alde batetik, zenbait auditorium ospetsuk, hala nola, Madrileko Nacionalek edo Monumentalek eta Sevillako Teatro de la Maestranzako Manuel García aretoak hartu izan dituzte pianistaren errezitaldiak.

Errezitaldirako sarrerak zortzina euroan erosi ahalko dira Vital Kutxa Fundazioa Gelan (Bakea kalea, 5, 1. solairua. Dendaraba), hura hasi baino ordubete lehenagotik.